उपसंपादक – कल्पेश महाले
चाळीसगाव – दि.३० एप्रिल २०२५ रोजी पहाटेच्या सुमारास चाळीसगाव शहर पोलीस स्टेशनचे अधिकारी व कर्मचारी नाईट राऊंड व नाकाबंदी ड्युटीवर असताना, मालेगाव रोडवरील धुळे ते छत्रपती संभाजीनगर बायपास चौफुली येथे वाहनांची तपासणी करीत असताना या तपासणी दरम्यान एक पांढऱ्या रंगाची मारुती स्विफ्ट डिझायर एम.एच.१२ के.एन. २३०५ ही गाडी थांबवून तपासणी केली असता, गाडीच्या डिक्कीमध्ये निळ्या रंगाच्या चार प्लास्टिक पिशव्यात गांजासारखा वास असलेला पदार्थ आढळून आला. सदरची माहिती मिळताच पोलीस निरीक्षक किरणकुमार कबाडी हे तात्काळ घटनास्थळी दाखल झाले होते.
यावेळी फॉरेन्सिक पथक व पंचासमक्ष झालेल्या तपासणीत सदर पदार्थ हा अंमली पदार्थ ‘गांजा’ असल्याचे निष्पन्न झाले असता घटनास्थळी शेख नदीम शेख बशीर (वय ४० वर्षे, रा. गुलवानी खालदा, गल्ली नं. ३, मालेगाव,जि.नाशिक) या आरोपीला ताब्यात घेण्यात आले असून सदर गांजाचे एकूण वजन ४२ किलो ५८३ ग्रॅम असून, त्याचे अंदाजित बाजारमूल्य रु. २४,६९,१५०/- इतके आहे. तसेच वाहतुकीसाठी वापरलेली गाडी देखील जप्त करण्यात आली आहे. या प्रकरणी NDPS कायदा कलम 8(C), 20(B), 29 अन्वये चाळीसगाव शहर पोलीस स्टेशन येथे गुन्हा दाखल करण्यात आलेला असून, पुढील तपास सुरु आहे.
यांच्या पथकाने केली कारवाई
ही धडक कारवाई पोलीस अधीक्षक जळगाव डॉ.महेश्वर रेड्डी, अप्पर पोलीस अधीक्षक कविता नेरकर व पोलीस उपअधीक्षक राजेश चंदेल यांच्या मार्गदर्शनाखाली व पोलीस निरीक्षक किरणकुमार कबाडी यांच्या नेतृत्वाखाली पोलीस उपनिरीक्षक संदीप घुले, योगेश माळी, कैलास पाटील, अरुण बाविस्कर, पोलीस हवा.राहुल सोनवणे, विनोद पाटील, योगेश बेलदार, अजय पाटील, पोलीस नाईक भूषण पाटील, राकेश पाटील, नितीन आगोणे, महेंद्र पाटील, नरेंद्र चौधरी, अमोल भोसले, निलेश पाटील, नाना बच्चे, आशुतोष सोनवणे, विजू पाटील, राकेश महाजन, समाधान पाटील, दीपक चौधरी, पवन पाटील, म.पो.कॉ.सभा शेख यांच्या पथकाने केली.
