लोकांना न्याय देणाराच निघाला लाचखोर; जिल्हा सत्र न्यायाधीश पाच लाखांची लाच घेताना एसीबीच्या जाळ्यात.
उपसंपादक – कल्पेश महाले
सातारा – जिल्ह्यात अत्यंत क्लेशदायक घटना घडली असून, न्याय देणाराच लाच प्रकरणात अडकला आहे. पाच लाख रुपयांची लाच घेतल्याप्रकरणी जिल्हा सत्र न्यायाधीश धनंजय निकम याच्यासह इतर तिघांविरोधात गुन्हा दाखल करण्यात आला असून त्यांना ताब्यात घेण्यात आलं आहे. विशेष म्हणजे सातारा न्यायालयाच्या आवारातच ही घटना घडली आहे. या घटनेत न्यायाधीशानेच लाच घेतल्याने सर्वत्र चर्चा सुरू असून न्याय व्यवस्थेवरील विश्वासाला तडा गेला आहे.
याबाबत सविस्तर माहिती असे की, सातारा जिल्हा सत्र न्यायालयात दाखल जामिन अर्जाबाबत मदत आणि जामिन करून देण्यासाठी पाच लाख रुपयांची लाच मिळवण्याचा प्रयत्न केला. या प्रकरणी जिल्हा सत्र न्यायाधीश धनंजय निकम यांच्यासह इतर तिघांविरोधात तक्रार देण्यात आली होती. सातारा शहर पोलीस ठाण्यात लाचलुचपत प्रतिबंधक कायदा कलम अन्वये चौघांवर गुन्हा दाखल केला आहे. पुणे-सातारा अँटी करप्शन विभागाने संयुक्तिकपणे साताऱ्यात मोठी कारवाई केली आहे.
याप्रकरणी पुणे येथील एका तरुणीने तक्रार दिली होती. त्यानुसार आनंद मोहन खरात (रा. खरातवस्ती, दहिवडी, ता. माण), किशोर संभाजी खरात (रा. वरळी मुंबई), जिल्हा सत्र न्यायाधीश धनंजय निकम आणि अनोळखी एकाविरोधात गुन्हा नोंद झाला होता. हा प्रकार ३, ९ आणि १० डिसेंबर रोजी घडला होता. तक्रारदार तरुणीच्या वडिलांचा जिल्हा सत्र न्यायालयात जामिन अर्ज आहे. यासाठी संशयित एक आणि दोन यांनी जिल्हा सत्र न्यायाधीश निकम यांच्यांशी संगनमत केले. तसेच जामिन अर्जाबाबत मदत करणे, जामिन करून देण्यासाठी न्यायाधीश निकम यांच्यासाठी पाच लाख रुपयांची मागणी केली.
जामिनाबाबत पूर्वी ठरलेल्या एमएसईबी कोडमध्ये चर्चा करण्यात आली. तसेच १० डिसेंबर रोजी संशयित आनंद खरात, किशोर खरात आणि त्यांच्यासोबत अनोळखी व्यक्तीने तक्रारदार तरुणीकडे पाच लाख रुपये स्वीकारण्याची तयारी दाखवली होती. त्यानंतर पैसे गाडीत आणून द्या, असं सांगून लाच रक्कम मिळवण्याचा प्रयत्न केला. तदनंतर जिल्हा सत्र न्यायालयाच्या आवारातच या घडामोडी घडल्या आहेत. येथील एका हॉटेलमध्ये सापळा रचून लाचलुचपत विभागाच्या पथकाने सर्वांना रंगेहात पकडले, त्यानंतर कायदेशीर प्रक्रियेद्वारे गुन्हा दाखल करण्यात आला. दरम्यान, या घटनेने सातारा जिल्ह्यासह राज्यभरात खळबळ उडाली आहे.
यांच्या पथकाने केली कारवाई
लाचलुचपत प्रतिबंधक विभाग, पुणे परिक्षेत्राचे पोलीस अधीक्षक शिरीष देशपांडे, अप्पर पोलीस अधीक्षक डॉ. शितल जानवे यांच्या मार्गदर्शनाखाली अनिल कटके पोलीस उपअधीक्षक, दयानंद गावडे पोलीस उपअधीक्षक यांच्यासह अधिकारी व कर्मचारी यांच्या पथकाने केली.
प्रशासन आणि पोलीस यंत्रणांमधील भ्रष्टाचाराच्या घटना वारंवार समोर येत असतात. मात्र, न्यायव्यवस्थेतील वरिष्ठ अधिकारीच अशा प्रकरणात अडकल्याने ही घटना अधिक गंभीर बनली आहे. यामुळे संपूर्ण न्यायव्यवस्थेची पारदर्शकता आणि विश्वासार्हतेवर प्रश्नचिन्ह उपस्थित झाले आहेत. या घटनेमुळे नागरिकांच्या न्याय हक्कांसाठी कार्यरत राहणाऱ्या व्यवस्थेतील भ्रष्टाचाराची ही घटना गंभीर मानली जात आहे. राज्यभरातून या प्रकरणावर तीव्र प्रतिक्रिया उमटत असून, न्यायालयाच्या प्रतिष्ठेला तडा गेल्याची भावना व्यक्त केली जात आहे.
